Shadow Slave Chapter 144 Myanmar Translation

Tab 1

အခန်း (၁၄၄) စိန်ခေါ်ခွင့်

Sunny ၏ ကျောပြင်တစ်လျှောက်၌ အေးစက်သော ချွေးများ စီးကျလာသည်။ မြွေဟောက်တစ်ကောင်လို အေးစက်စူးရှသော Gunlaug ၏ အသံကြောင့် တုန်လှုပ်သွားကာ၊ ဒူးထောက်ချပြီး ခွင့်လွှတ်ပေးရန် တောင်းပန်ချင်စိတ်များပင် ပေါ်လာမိသည်။ သို့သော်လည်း ဤခန်းမကြီးအတွင်းရှိ လူတိုင်းသည်လည်း ယခုအချိန်၌ ထိုကဲ့သို့သော ခံစားချက်မျိုးကို ခံစားနေရမည်ဆိုသည်ကို သူ နားလည်ထားသည်။

ဤနေရာရှိ လူတိုင်းသည် ထိုအာဏာရှင်အတွက် ပြစ်မှုမြောက်စေမည့် ကိစ္စတစ်စုံတစ်ရာကိုတော့ လုပ်ဖူးကြသူချည်းပင် ဖြစ်သည်။

လူများ သူတို့၏ အပြစ်များကို စတင်ဝန်ခံကြတော့မည်ဟု သူ ထင်မှတ်လုနီးပါးဖြစ်သွားစဉ်၊ ထိုအချိန်၌ပင် တံခါးပေါက်ဆီမှ ထူးဆန်းသော ဆူညံသံတစ်ခုက သူ၏ အာရုံကို ဆွဲဆောင်သွားခဲ့သည်။

ခြိမ်းခြောက်လိုသော ပြတ်သားမှုအပြည့်ဖြင့် လှုပ်ရှားလာကာ၊ အစောင့်နှစ်ယောက်က အမျိုးသားတစ်ယောက်ကို ခန်းမအလယ်သို့ ဆွဲခေါ်လာပြီး ကြမ်းပြင်ပေါ်သို့ ပစ်ချလိုက်သည်။ ထိုအမျိုးသားသည် စုတ်ပြတ်နေသော အဝတ်အစားများကို ဝတ်ဆင်ထားပြီး အရိုးပေါ်အရေတင် ပိန်ချုံးနေကာ၊ ယင်းကပင် သူ့ကို အပြင်ဘက်အခြေချစခန်းမှ နေထိုင်သူတစ်ဦးဖြစ်ကြောင်း ဖော်ပြနေသည်။

သို့သော်လည်း သူ၏ ပါးလျသော အရေပြားအောက်တွင် သန်မာလှသော ကြွက်သားစိုင်များ ရှိနေပြီး၊ သူ၏ မျက်လုံးများထဲရှိ ဒေါသထွက်နေသော်လည်း ကြောက်ရွံ့မှုကင်းမဲ့နေသော အကြည့်များက ထိုလူကို ဂုဏ်သိက္ခာရှိပြီး မာနထောင်လွှားနေသယောင် ပေါ်လွင်စေသည်။ အစောင့်များကို မထီမဲ့မြင် အကြည့်ဖြင့် စိုက်ကြည့်ရင်း၊ သူက ကြမ်းပြင်ပေါ်မှ ထကာ ကျောကိုမတ်၊ ခေါင်းကိုမော့လျက် မတ်တပ်ရပ်လိုက်သည်။ သူ၏ မျက်နှာပေါ်တွင် အကြောက်တရား တစ်စက်လေးမျှ မရှိပေ။ ယင်းအစား အုံ့မှိုင်းပြီး ပြင်းထန်လှသော နာကြည်းမှုများသာ ရှိနေသည်။

Gunlaug သည် သူ၏ ရာဇပလ္လင်ပေါ်မှနေ၍ ထိုရဲရင့်သော အမျိုးသားကို ငုံ့ကြည့်လိုက်ပြီး ခေါင်းကို အနည်းငယ် စောင်းလိုက်သည်။ အပြင်လူသည် ရွှေရောင်မျက်နှာဖုံးပေါ်တွင် သူ၏ အရိပ်ကို မြင်ပြီးနောက် မျက်နှာရှုံ့မဲ့သွားသော်လည်း၊ ခေါင်းကိုတော့ ငုံ့မသွားခဲ့ပေ။

'ဒါက သန့်စင်တဲ့ စိတ်စွမ်းအားပဲ၊' သူစိမ်းဖြစ်သူအပေါ် သဘောကျသွားလျက် Sunny တွေးလိုက်သည်။

ထိုအတောအတွင်း၊ တောက်ပသောသခင် (Bright Lord) ၏ အသံသည် ခန်းမကြီးအတွင်း နောက်တစ်ကြိမ် ထပ်မံ ပဲ့တင်ထပ်လာပြန်သည်။

"ငါ့ရဲ့ လက်အောက်ခံတွေ။ ဒီနေ့ ငါတို့ဆီမှာ ဧည့်သည်တစ်ယောက် ရောက်နေတယ်။ Jubei လို့ခေါ်တဲ့ ဒီလူက အပြင်ဘက်အခြေချစခန်းကနေ လာလည်တာပဲ။ မကြာသေးခင်က သူဟာ ငါ့လူတစ်ယောက်ကို စွပ်စွဲပြောဆိုနေတယ်လို့ ကြားရတယ်။ တရားမျှတပြီး ကရုဏာရှင် သခင်တစ်ယောက်အနေနဲ့၊ Jubei ကို သူ့ရဲ့ အမှုကို ဖြေရှင်းဖို့နဲ့ တရားခံကို ဖော်ထုတ်ဖို့ ဒီနေရာကို ငါဖိတ်ခေါ်လိုက်တာပါ။ ငါတို့ ဒီကိစ္စရဲ့ အရင်းအမြစ်ကို ရောက်အောင် စုံစမ်းရမယ်! ဘာပဲဖြစ်ဖြစ် ဒီအမှောင်ကမ္ဘာကြီးမှာ ဥပဒေဆိုတာ ငါတို့အတွက် တစ်ခုတည်းသော လမ်းပြကြယ်ပဲလေ..."

Gunlaug ၏ သံချပ်ကာမှ ထွက်ပေါ်လာသော စိတ်ပိုင်းဆိုင်ရာ ဖိအားများမှ လွတ်ကင်းနေသော်လည်း၊ Sunny သည် သူ၏ နက်ရှိုင်းပြီး နူးညံ့သောအသံကြောင့် ထူးဆန်းစွာ လွှမ်းမိုးခံလိုက်ရသေးသည်။ ကြက်သီးများပင် ထသွားခဲ့သည်။ ရွှေရောင် အမှတ်တရ (Memory) ရှိသည်ဖြစ်စေ၊ မရှိသည်ဖြစ်စေ တောက်ပသောသခင် (Bright Lord) သည် သြဇာညောင်းပြီး လူကို ညှို့ယူဖမ်းစားနိုင်စွမ်းရှိသည်။ သူ၏စကားကို နားမထောင်ဘဲနေရန် ခက်ခဲလှသည်။

သို့သော် Jubei ဟုခေါ်သော အမျိုးသားကမူ လှောင်ပြုံး ပြုံးလိုက်ရုံသာဖြစ်သည်။

"ဟုတ်တယ်။ မင်းရဲ့ လူမိုက်တစ်ယောက်ကို စွပ်စွဲဖို့ ငါ ဒီကိုရောက်လာတာပဲ Gunlaug။ မင်း ဒီကိစ္စကနေ ဘယ်လို လွတ်အောင်ရုန်းမလဲဆိုတာ ကြည့်ကြသေးတာပေါ့၊ ခွေးကောင်။"

ထိုသို့ပြောပြီးနောက် သူက လက်တစ်ဖက်ကို မြှောက်ကာ ခန်းမကြီး၏ သူတို့ပုံမှန်နေနေကျ ထောင့်တစ်နေရာမှ အခြေအနေကို စောင့်ကြည့်နေသော မုဆိုး (Hunter) အုပ်စုဆီသို့ လက်ညှိုးထိုးလိုက်သည်။

"ဟိုမှာရှိတဲ့လူ၊ မင်းရဲ့ လမ်းပြ (Pathfinder) လို့ခေါ်တဲ့ သူတွေထဲက တစ်ယောက်ဟာ လူသတ်မှု ကျူးလွန်ထားတယ်။ သူဟာ အပြစ်ကင်းတဲ့ ကလေးတစ်ယောက်ကို အလွန်ရွံရှာဖွယ်ကောင်းတဲ့ နည်းလမ်းနဲ့ သတ်ပစ်ခဲ့တယ်။ ဒီနှစ်တွေတစ်လျှောက် မင်းနဲ့ မင်းရဲ့ တပည့်တွေ လုပ်သမျှ ယုတ်မာတဲ့ ရာဇဝတ်မှုမျိုးစုံကို ငါကြည့်နေခဲ့တာ၊ ဒါပေမဲ့ အခုတော့ တော်သင့်ပြီ။ ဒီနေ့ သူလုပ်ခဲ့တဲ့ကိစ္စအတွက် သူ့အသက်နဲ့ သူ ပြန်ပေးဆပ်ရတာကို ငါ မြင်ရမယ်!"

တုန်လှုပ်ချောက်ချားသွားသော တီးတိုးရေရွတ်သံများ လူအုပ်ကြားထဲ ပျံ့နှံ့သွားသည်။ လမ်းပြ (Pathfinder) တစ်ယောက်ကို စွပ်စွဲခြင်းသည် အသိဉာဏ်ရှိသူ မည်သူမဆို ပြုလုပ်မည့် အရာမျိုး မဟုတ်ပေ။ သူတို့၏ လေးစားခံရသော အဆင့်အတန်းကြောင့်၊ ဤလူများသည် ထိ၍ပင်မရသလောက် ဖြစ်နေသည်။ သို့သော်လည်း၊ Jubei ကမူ နောက်ဆုတ်မည့်ပုံ မပေါ်ပေ။

Gunlaug က ပြောလိုက်သည်။

"...ဒါအမှန်ပဲလား? ဒါဟာ ကြီးလေးတဲ့ စွပ်စွဲချက်တစ်ခုပဲ Jubei။ ကျေးဇူးပြုပြီး ငါတို့ကို ထပ်ပြောပြပါဦး။"

အပြင်ဘက်အခြေချစခန်းမှ အမျိုးသားက သွားကြိတ်လိုက်သည်။

"ဒီအမှိုက်ကောင်နဲ့ သူ့လူတွေက ဆုလာဘ်တွေနဲ့ ချမ်းသာကြွယ်ဝမှုတွေ ပေးမယ်လို့ ကတိပေးပြီး ရိုးအတဲ့ ကလေးတစ်ယောက်ကို သူတို့အဖွဲ့ထဲ မျှားခေါ်ခဲ့တယ်။ အဲဒီကလေးကို သူတို့ထဲက တစ်ယောက်ဖြစ်လာမယ်၊ ပြီးရင် မင်းရဲ့ ကျိန်စာသင့်နေတဲ့ ရဲတိုက်ကြီးထဲမှာ လာနေရမယ်လို့ သူတို့က ပြောခဲ့ကြတယ်။ ဒါပေမဲ့ တကယ်တမ်းကျတော့၊ သူတို့က အဲဒီကလေးကို သတ္တဝါဆိုးတွေ (Monsters) ဆီမှာ ငါးစာအဖြစ် ကျွေးပစ်လိုက်တာပဲ!"

သူက ကြမ်းပြင်ပေါ်သို့ တံတွေးထွေးချလိုက်သည်။

"မင်းတို့ကိုယ် မင်းတို့ မုဆိုး (Hunters) တွေလို့ ခေါ်ရဲသေးတာလား၊ မသာကောင် သူရဲဘောကြောင်တဲ့ကောင်တွေ?! မင်းတို့မှာ အရှက်ဆိုတာ မရှိဘူးလား?!"

လေးလံသော တိတ်ဆိတ်မှုကြီးတစ်ခု ခန်းမကြီးထဲတွင် ကြီးစိုးသွားသည်။ ယခုအခါ လူများသည် မုဆိုး (Hunter) အုပ်စုကို မှောင်မိုက်သော မျက်နှာထားများဖြင့် စိုက်ကြည့်နေကြသည်။ ရဲတိုက်အတွင်း နေထိုင်သူများသည် ယုတ်မာသော လုပ်ရပ်မျိုးစုံကို မမြင်ယောင်ဆောင်နေကျ ဖြစ်သော်လည်း၊ ထိုလုပ်ရပ်အားလုံးသည် လူသားအချင်းချင်းအပေါ် ကျူးလွန်ခဲ့ကြခြင်းသာ ဖြစ်သည်။

သူတို့ ခွင့်မလွှတ်နိုင်သောအရာမှာ လူသားတစ်ဦးက ၎င်းတို့၏ မျိုးနွယ်တူတစ်ဦးအား အိပ်မက်ဆိုး သတ္တဝါများ (Nightmare Creatures) ဆီသို့ သစ္စာဖောက် အပ်နှင်းခြင်းပင်ဖြစ်သည်။ အမှောင်မြို့တော် (Dark City) တွင် ဤအရာသည် ဘာသာရေးစော်ကားမှုနှင့် တူညီသည်။

Gunlaug သည် သူ၏ ခေါင်းကိုလှည့်ကာ မုဆိုးများ (Hunters) ဘက်သို့ မျက်နှာမူလိုက်ရာ၊ သူတို့သည် သူ၏ အကြည့်အောက်တွင် တုန်ယင်သွားကြသည်။

"ဒါ အမှန်ပဲလား?"

အုပ်စုထဲတွင် အသက်အကြီးဆုံးဖြစ်သော လမ်းပြ (Pathfinder) က Jubei ကို အုံ့မှိုင်းစွာ လှမ်းကြည့်ပြီး မျက်မှောင်ကြုတ်လိုက်သည်။

"တစ်ခုခု နားလည်မှုလွဲနေတာ ဖြစ်ရပါမယ် အရှင်။ အခုပြောနေတဲ့ ကောင်လေးက ကျွန်တော့်အဖွဲ့ရဲ့ အရမ်းကို တန်ဖိုးထားရတဲ့ အဖွဲ့ဝင်တစ်ယောက်ပါ။ သူ့ရဲ့ အနာဂတ်အတွက် ကျွန်တော်တို့အားလုံး မျှော်လင့်ချက်ကြီးကြီး ထားခဲ့ကြတာပါ။ သူ့သေဆုံးမှုက ကျွန်တော်တို့အားလုံးကို အများကြီး ဝမ်းနည်းစေခဲ့ရပါတယ်။"

သူ၏ အသံသည် တည်ငြိမ်အေးဆေးနေသည်။ သို့သော် အနည်းငယ် လွန်ကဲစွာ တည်ငြိမ်နေခြင်းလည်း ဖြစ်ကောင်းဖြစ်နိုင်သည်။

Jubei က ဟိန်းဟောက်လိုက်သည်။

"လိမ်နေတာ! အဲဒီနေ့က ငါကိုယ်တိုင်လည်း အမဲလိုက်ထွက်နေရင်း ငါ့မျက်စိနှစ်ကွင်းနဲ့ အရာအားလုံးကို မြင်ခဲ့တာ! မင်း ဘာလုပ်ခဲ့တယ်ဆိုတာ ငါသိတယ်၊ ခွေးကောင်!"

Gunlaug သည် လူအုပ်ကြီးဘက်သို့ မျက်နှာမူလိုက်ပြီး သက်ပြင်းချလိုက်သည်။ အချိန်အနည်းငယ် ကြာပြီးနောက် သူက လေးနက်စွာ ပြောလိုက်သည်။

"ဘယ်လောက် ကံဆိုးလိုက်တဲ့ အခြေအနေလဲ။ မင်းစကားနဲ့ သူ့စကား ထိပ်တိုက်တွေ့နေပြီ ထင်တယ် Jubei။ ဘယ်လိုလုပ်ရမလဲ၊ ဘာလုပ်ရမလဲ? သေချာတာကတော့ ငါ့ရဲ့ ရဲရင့်တဲ့လူတွေကို ငါ အပြည့်အဝ ယုံကြည်တယ်။ မင်းတို့အားလုံး အသက်ရှင်နေအောင် ကာကွယ်ပေးနေတဲ့ ဒီသူရဲကောင်းတွေကို မယုံကြည်ရလောက်အောင် ဘယ်သူကများ ကျေးဇူးကန်းမှာလဲ? သေချာတာပေါ့၊ ငါ့ရဲ့ အဖိုးတန်တဲ့ လက်အောက်ခံတွေထဲမှာ အဲဒီလောက် ယုတ်မာဆိုးသွမ်းတဲ့သူ တစ်ယောက်မှ မရှိနိုင်ပါဘူး။"

ကောက်ကျစ်စဉ်းလဲသော အသံဖြင့် သီးသန့် ရည်ရွယ်ပြောဆိုခံလိုက်ရသလို ခံစားလိုက်ရသဖြင့် Sunny အသက်အောင့်ထားလိုက်မိသည်။ ထိုစကားလုံးများနောက်ကွယ်တွင် ဖုံးကွယ်ထားသော ကြက်သီးမွေးညင်းထဖွယ် ခြိမ်းခြောက်မှုသည် လျှို့ဝှက်လွန်းလှသည်တော့ မဟုတ်ပေ။

Gunlaug သည် ခဏတာမျှ တိတ်ဆိတ်သွားပြီး သူ၏ ဖိနှိပ်လိုသော စိတ်ပိုင်းဆိုင်ရာ အငွေ့အသက်များဖြင့် လူအုပ်ကြီးကို ရိုက်ခတ်လိုက်သည်။ ထို့နောက် သူက မျက်နှာလွှဲလိုက်ကာ လူများကို အသက်ရှူခွင့်ပေးလိုက်ပြီး ပြောလိုက်သည်။

"ဒါပေမဲ့ ဒီလို ကြီးလေးတဲ့ကိစ္စမျိုးမှာ မျက်နှာလိုက်တာက ငါ့အတွက် မသင့်တော်ဘူးလေ။ ပြီးတော့ ဒီကိစ္စက၊ အိုး.. တကယ်ကို ကြီးလေးတာပဲ။ ဘယ်လို အကျပ်ရိုက်စရာကောင်းလိုက်သလဲ။ ငါတို့ တရားမျှတမှုကို ဘယ်လို ထိန်းသိမ်းကြမလဲ၊ ငါ့ရဲ့ လက်အောက်ခံတို့?"

ဆက်တိုက်ဖြစ်ပေါ်လာသော တိတ်ဆိတ်မှုထဲတွင်၊ မုဆိုးများ (Hunters) နှင့် လမ်းပြများ (Pathfinders) ၏ ခေါင်းဆောင်ဖြစ်သူ Gemma က ရုတ်တရက် ထပြောလိုက်သည်။

"သခင်ကြီး၊ ကျွန်တော် စကားတစ်ခွန်းလောက် ပြောခွင့်ပြုပါ။ ဒီအခြေအနေနဲ့ ကွက်တိကျတဲ့ ဥပဒေတစ်ခု ရှိနေတယ်မဟုတ်လား? လူသားတွေ ဒီရှေးဟောင်း ရဲတိုက်ကြီးထဲမှာ နေထိုင်ခဲ့တဲ့ အချိန်ကတည်းက အဲဒါက တည်ရှိနေခဲ့တာပါ။ သေချာတာပေါ့၊ ကျွန်တော် ပြောနေတာ စိန်ခေါ်ခွင့်ကိုပါ။"

သူက Jubei ကို လှမ်းကြည့်ပြီး ပြုံးလိုက်သည်။

"ဒီရဲရင့်တဲ့ မုဆိုးက သူ့ရဲ့ စွပ်စွဲချက်နဲ့ပတ်သက်ပြီး သံသယအရိပ်အယောင်လေး ရှိနေသေးရင်၊ သူ နောက်ဆုတ်သင့်တယ်။ အဲဒီလိုမှ မဟုတ်ရင်၊ သူက တရားခံကို စိန်ခေါ်ပြီး သွေးနဲ့ သက်သေပြနိုင်တယ်။ သေချာတာပေါ့၊ ဒီနေရာက တကယ့်တရားခံက... ကျွန်တော်ပါပဲ။ ဒီလူတွေအတွက် တာဝန်ရှိသူ တစ်ယောက်အနေနဲ့ မုဆိုးတွေအဖြစ် သူတို့ရဲ့ လုပ်ငန်းဆောင်တာတွေမှာ ကျူးလွန်သမျှ ရာဇဝတ်မှုတိုင်းဟာ ကျွန်တော့်အမှားပါပဲ။"

Gemma ၏ ဆွဲဆောင်မှုရှိသော အပြုံးသည် ကျယ်ပြန့်ကာ ရင်းနှီးဖော်ရွေမှု အပြည့်ရှိနေသည်။

"ဒါဆို ဘယ်လိုလဲ၊ Jubei? မင်း နောက်ဆုတ်မလား? ဒါမှမဟုတ် ငါ့ကို စိန်ခေါ်ချင်သလား?"

အပြင်ဘက်အခြေချစခန်းမှ မုဆိုးက ဒေါသနှင့် မထီမဲ့မြင်ပြုမှုများ တောက်လောင်နေသော မျက်လုံးများဖြင့် သူ့ကို အတန်ကြာ စူးစိုက်ကြည့်နေခဲ့သည်။ နောက်ဆုံးတွင် သူက တံတွေးထွေးချလိုက်သည်။

"ငါက မင်းကို ကြောက်နေတယ်လို့ ထင်နေတာလား၊ အမြီးနှံ့ခွေးကောင်? ရတာပေါ့၊ ဘာလို့မရရမှာလဲ။ မင်းကို ငါ စိန်ခေါ်တယ်!"